Cos seus 331 metros de eslora e 43 de manga, o «MSC Virtuosa» visita a cidade naval por primeira vez.

Ferrol, 16 de setembro de 2021

Esta mañá recalou no porto de Ferrol o maior cruceiro da actual tempada: o MSC Virtuosa. Con 331 metros de eslora e 43 de manga, no seu interior poden viaxar ata 8.000 persoas, entre pasaxeiros e tripulantes, aínda que os protocolos de seguridade sanitaria reduciron notablemente a capacidade do barco. Toda a operativa realizouse en coordinación coas autoridades sanitarias e a navieira.

Con esta visita, a primeira do MSC Virtuosa á cidade naval, o porto continúa no seu camiño cara á recuperación da normalidade, tamén no tráfico de cruceiristas.

O presidente da Autoridade Portuaria de Ferrol-San Cibrao, Francisco Barea, realizou o protocolario intercambio de metopas co capitán do buque, Stefano Battinelli, nun acto no que tamén estivo presente o director de Cruceiros de Bergé, José Luis Carretero.

Tras esta de hoxe e a do martes, esta mesma semana hai prevista unha terceira escala de cruceiro na cidade: a do Amera, de 205 metros de eslora, mañá.