Os tráficos en Ferrol e San Cibrao crecen un 5,6 % no segundo trimestre e alcanzan os 3,4 millóns de toneladas movidas na primeira metade do ano
A mercadoría xeral consolida a súa tendencia en positivo e rexistra un incremento do 54 % no primeiro semestre paliando a caída dos graneis sólidos e o lixeiro descenso dos líquidos
A terminal de contedores de Yilport intensifica a súa actividade ata as 187.070 toneladas, un 174 % máis que no mesmo período de 2024
Ferrol, 17 de xullo de 2025
A Autoridade Portuaria de Ferrol-San Cibrao pecha a primeira metade do 2025 confirmando unha paulatina recuperación dos tráficos que experimentaron un mellor comportamento no segundo trimestre do ano. Así, entre o 1 de abril e o 30 de xuño movéronse nos peiraos de Ferrol e San Cibrao 1.987.027 toneladas, o que supón un 5,6 % máis que no mesmo período do exercicio anterior no que o movemento foi de 1.880.408 toneladas. Os meses de abril e xuño foron especialmente favorables cun destacado crecemento dos tráficos. A tendencia á alza da mercadoría xeral e a reactivación da actividade na terminal de contedores favoreceron esa evolución que permite paliar a caída rexistrada nos tres primeiros meses de 2025.
Así, con datos pendentes de consolidar, a mercadoría xeral é que a experimentou un mellor comportamento ao aumentar un 53,81 % no primeiro semestre deste ano. En total movéronse 540.050 toneladas fronte ás 351.120 do mesmo período do ano pasado. Este crecemento permite paliar o descenso que seguen experimentando os graneis sólidos, especialmente afectados pola desaparición do carbón. En total, nos peiraos de Ferrol e San Cibrao movéronse algo máis de 1,6 millóns de toneladas de graneis sólidos, o que supón un 18,23 % menos. Os líquidos, pola súa banda, mantéñense en cifras similares alcanzando as 1.239.984 toneladas na primeira metade deste exercicio, fronte ás 1.285.927 da primeira metade do 2024. O GNL consolida a súa evolución en positivo e continúa liderando os movementos deste tipo de tráficos nos portos da Autoridade Portuaria.
A mellora experimentada a medida que avanzaba o ano reflíctese especialmente nos contedores. A terminal de Yilport volveu a coller impulso e iso tradúcese nun importante incremento dos movementos rexistrados nestas instalacións. O crecemento, en toneladas, foi dun 174,09 % ata o 30 de xuño. Contabilizáronse na primeira metade do ano 187.070 toneladas fronte ás 68.251 do mesmo período do 2024. En TEUs o crecemento é moi similar: un 134,40 % máis, pasando dos 7.354 TEU do primeiro semestre do exercicio anterior, aos 17.217 que levamos este ano.
En total, nos peiraos da Autoridade Portuaria de Ferrol-San Cibrao movéronse nos seis primeiros meses do 2025 un total de 3.425.263 millóns de toneladas fronte ás 3.649.188 contabilizadas no primeiro semestre do 2024. Isto supón un 6,1 % menos e reflicte unha evolución en positivo a medida que avanza o ano que, todo apunta, a que pechará en termos similares ao do exercicio anterior.