Os portos de Ferrol e San Cibrao resisten ante o contexto internacional e mantéñense en positivo cun crecemento do 3,26% con respecto ao mesmo período de 2025

Os graneis líquidos consolidan a súa tendencia cun incremento do 31,52% e palían o descenso de sólidos e mercancía xeral

Ferrol, 19 de outubro de 2026

A Autoridade Portuaria de Ferrol-San Cibrao mantén a tendencia en positivo no balance de tráficos. Nos nove primeiros meses deste ano, nos peiraos de Ferrol e San Cibrao movéronse un total de 5.296.854 toneladas fronte ás 5.129.492 do mesmo período do ano anterior, é dicir, 167.362 toneladas máis. Isto supón un crecemento do 3,26% o que implica manter unha tendencia positiva nun contexto de incerteza internacional que afecta o transporte marítimo.

O incremento é especialmente significativo nos graneis líquidos. Entre o 1 de xaneiro e o 30 de setembro de 2026 movéronse 2.298.296 toneladas de graneis líquidos fronte aos 1.747.493 do mesmo período de 2025. Isto supón 550.803 toneladas máis, é dicir, un incremento do 31,52% co gas natural e o fuel como principais tráficos. Este incremento dos líquidos permite paliar o descenso que se rexistra de nevo nos sólidos que se baixan un 12,57% e contabilizan un movemento de 2.322.455 toneladas.

A mercancía xeral, pola súa banda, alcanza as 676.102 toneladas movidas nos nove primeiros meses do ano fronte ás 725.586 do mesmo período do 2025. As tensións xeopolíticas afectan especialmente a este segmento dos tráficos e con especial incidencia á mercancía contenerizada. Na terminal de Yilport movéronse ata o 30 de setembro 8.093 TEUs (104.843 toneladas).