O tráfico de GNL experimenta un incremento dun 21 % con respecto ao mesmo período do 2024 e supera as 431.000 toneladas entre xaneiro e marzo deste ano

Nos peiraos da Autoridade Portuaria de Ferrol-San Cibrao movéronse en tres meses de 1,4 millóns de toneladas

 Ferrol, 16 de abril de 2025

A Autoridade Portuaria de Ferrol-San Cibrao comezou o 2025 cunha recuperación dos graneis líquidos e un repunte na actividade da terminal de contedores, o que permitiu amortecer o descenso rexistrado noutros segmentos de tráficos, especialmente os graneis sólidos. Así, no primeiro trimestre do ano, movéronse nos peiraos de Ferrol e San Cibrao 530.567 toneladas de líquidos fronte ás 485.043 do mesmo período do 2024, o que supón un incremento do 9,39 %. No caso dos graneis líquidos destaca o bo comportamento do GNL que, nos tres primeiros meses do exercicio, alcanzou as 431.473 toneladas fronte ás 356.312 do primeiro trimestre do ano anterior. É dicir, o tráfico de gas natural licuado creceu un 21,09 %.

O outro segmento que comezou o ano mellorando os índices de actividade é o dos contedores. Con datos aínda non consolidados, ao 31 de marzo movéronse na terminal de Yilport 38.834 toneladas de mercadorías, o que supón un aumento do 32,43 %. Se o medimos en TEUs, o incremento é de 40,67 % ao contabilizarse algo máis de 4.000 TEUs.

O bo comportamento dos graneis líquidos e a reactivación dos movementos de contedores permitiu paliar a caída rexistrada nos sólidos. Nos peiraos de Ferrol e San Cibrao movéronse, desde o 1 de xaneiro ata o 31 de marzo de 2025, preto de 757.000 toneladas de graneis sólidos, 369.000 menos que no mesmo período do ano anterior. Un descenso provocado, entre outros factores, pola desaparición do carbón. O que fose o principal tráfico da Autoridade Portuaria apenas se moveu no que levamos de ano, contabilizándose 46.775 toneladas.

Polo que respecta á mercadoría xeral, mantense estable en parámetros moi similares ao do exercicio pasado: 160.079 toneladas nos tres primeiros meses do 2025, fronte ás 162.548 do mesmo período do 2024.

En total, nos peiraos de Ferrol e San Cibrao movéronse no primeiro trimestre do ano 1.447.575 toneladas, un 18,36 % menos que no mesmo período do exercicio anterior. As previsións apuntan a que a tendencia deste ano sexa similar á do 2024 en canto ao volume de tráficos, cunha recuperación dos líquidos. Trátase dun ano de transición que culminará no 2026 coa materialización dos proxectos en marcha, especialmente relacionados cos graneis líquidos e as enerxías renovables, que permitan superar a desaparición do carbón e a menor actividade da concesionaria da Mariña.