Francisco Barea reúnese co almirante xefe do Arsenal de Ferrol

Ferrol, 27 de setembro de 2021

O novo presidente da Autoridade Portuaria de Ferrol-San Cibrao iniciou hoxe unha serie de entrevistas con responsables de institucións da zona. Francisco Barea visitou ao almirante xefe do Arsenal, Ignacio Frutos. Nos próximos días, a este encontro seguirán outros similares.

Na súa toma de posesión, o pasado día 17, Barea xa se marcara a meta de “tender pontes entre o Porto e a cidade”. “Este Porto -dixo entón- é un dos principais motores socioeconómicos desta cidade. É a porta de entrada máis importante a Ferrol, así o foi durante séculos e así debe seguir séndoo. Considero fundamental profundar nas relacións desta institución co Concello, coa Universidade, coa Armada, con Navantia… Tanto a Administración coa empresa como as distintas Administracións entre si han de dialogar e despregar unha acción conxunta ao servizo dos cidadáns. Só con ese esforzo compartido poderemos iniciar a transformación económica e social que Ferrol precisa”.