O ARTISTA FERROLÁN MARCOS MELLA EXPÓN AS SÚAS FOTOS NO PORTO POR PRIMEIRA VEZ
Sobre estas liñas, varias das fotos que formarán parte da mostra programada na sala de exposicións da Autoridade Portuaria
Os visitantes poderán contemplar do 28 de agosto ao 4 de setembro vinte imaxes de faros e outras instalacións marítimas da zona.
A mostra é o resultado dun ano de traballo
Ferrol, 17 de agosto de 2018
O artista ferrolán Marcos Mella presentará por primeira vez no porto de Ferrol a súa obra fotográfica.
Será entre finais deste mes e principios do seguinte. A entrada será gratuíta.
A sala de exposicións da Autoridade Portuaria, ubicada no peirao de Curuxeiras, acollerá a mostra do 28 de agosto ao 4 de setembro. Baixo o título de Luces en el mar, estará composta por unha vintena de imaxes de mediano e gran tamaño impresas tanto en cor coma en branco e negro. As fotos recollen faros e outras instalacións marítimas da zona. Segundo o autor, son o froito de algo máis dun ano de traballo.
A exposición será inaugurada na tarde do 28, no que Mella, coñecido cantautor, tamén interpretará algún dos temas que formarán parte de 300 meses, o seu próximo disco, que sairá ao mercado cara a outubro. A partir do 29 e ata o seu peche, a mostra abrirá ao público en horario de 10:00 a 13:30 horas e de 17:00 a 20:00 horas.