A medida será efectiva desde o luns, 7 de outubro, e prolongarase durante dúas semanas para permitir avanzar nos traballos de continuación do carril bici ata A Cortina e o acondicionamento da zona pública do porto

Os vehículos dos traballadores das dependencias afectadas poderán acceder a través do porto interior, mentres que se mantén o acceso peonil por Curuxeiras

A Autoridade Portuaria pide desculpas polas molestias e recomenda utilizar o novo aparcamento disuasorio da Estrada Baixa

Ferrol, 3 de outubro de 2024

A recta final das obras de continuación do carril bici ata a Cortina e o acondicionamento da zona pública de Curuxeiras obrigan a realizar cortes de tráfico provisionais para permitir avanzar na remodelación da fachada marítima de Ferrol. A partir do próximo luns, 7 de outubro, o vial que discorre polo peirao de Curuxeiras, entre Capitanía Marítima e a Lonxa, cortarase á circulación rodada ata o 21 de outubro. A medida, que se adopta para poder seguir avanzando nesta fase dos traballos, afectará o tráfico de vehículos, manténdose o acceso peonil.

O corte do vial ao tráfico rodado afectará especialmente as dependencias de Capitanía Marítima, a Garda Civil e a Lonxa. Os traballadores que necesiten acceder cos seus vehículos poderán facelo a través do porto interior. No caso dos usuarios que acudan á peixaría da Lonxa, á Sala Curuxeiras ou á zona pública de porto, a Autoridade Portuaria recomenda deixar os vehículos no novo aparcamento disuasorio da Estrada Baixa que se atopa habilitado desde este verán.

A Autoridade Portuaria pide desculpas polas molestias que esta medida poida ocasionar e que tratará de minimizar na medida do posible. O organismo portuario é consciente da incomodidade que esta decisión pode causar pero que é necesaria para a finalización dunhas obras que supoñerán un cambio na fachada marítima da cidade e permitirán gañar espazo público para a cidadanía e facilitar a mobilidade sostible.