A Autoridade Portuaria e Global Ports Holding presentan en Seatrade Cruise Med das Palmas o proxecto conxunto que impulsará o tráfico de pasaxeiros e reafirmará a Ferrol como destino turístico

O presidente do organismo portuario, José Antonio Álvarez Vidal, destacou o carácter transformador da infraestrutura para o porto e a comarca e agradeceu á compañía a súa aposta

O director rexional de GPH para o Mediterráneo Occidental, Francesc Grau, resaltou que Ferrol supón un importante fito no seu crecemento e expansión en España e na rexión atlántica

Ferrol, 16 de setembro de 2026

O porto de Ferrol prevé contar cunha terminal de pasaxeiros operativa na primavera do próximo ano. Así se puxo de manifesto na presentación que a Autoridade Portuaria e Global Ports Holding realizaron de xeito conxunto na Seatrade Cruise Med 2026, un dos certames de referencia no sector. O presidente do organismo portuario, José Antonio Álvarez Vidal, e o director rexional de GPH para o Mediterráneo Occidental, Francesc Grau, cualificaron de “fito moi importante” a aposta por Ferrol do maior operador de terminais de cruceiros do mundo. A intervención tivo lugar na caseta de Portos do Estado ante representantes das distintas autoridades portuarias e profesionais do sector.

O presidente da Autoridade Portuaria de Ferrol-San Cibrao, José Antonio Álvarez Vidal, destacou a importancia de contar cunha compañía como Global Ports Holding e asegurou que “é unha alianza estratéxica, realmente aposta segura para o porto e para a cidade”. Tras resaltar as características técnicas dos peiraos e os recursos turísticos dunha comarca que sorprende ao visitante, Álvarez Vidal mostrouse orgulloso de poder presentar a nova terminal de cruceiros – Ferrol Cruise Port- que, sen dúbida, supoñerá unha importante transformación do noso porto e un impulso para o tráfico de pasaxeiros.

O presidente do organismo portuario incidiu na importancia que a nova infraestrutura terá para Ferrol e en “a ocasión que se presenta con Ferrol Cruise Port de dar un paso máis na transformación do porto, integralo no proxecto da relación porto-cidade”. En concreto destacou a transformación que se está acometendo co proxecto Abrir Ferrol ao Mar que “entre outras cousas vai permitir que ese Arsenal, auténtica xoia histórica, véxase xa sen a súa muralla, aberta a todos os cidadáns”. Antes de concluír, o presidente da Autoridade Portuaria quixo resaltar unha vez máis que a importancia da alianza con Global Ports Holding “que realmente significa a excelencia neste sector”. Por iso incidiu na mellora que vai supoñer a terminal “que esperamos contar con ela na primavera” e que “desde a posición modesta que ten hoxe Ferrol no tráfico de cruceiristas significará un avance estratéxico cun gran aliado”.

Consolidar Ferrol como destino

Pola súa banda, desde Global Ports Holding, Francesc Grau manifestou: “Ferrol supón unha importante incorporación á nosa carteira do Mediterráneo occidental e o Atlántico, o que reforza a nosa presenza en España e amplía o noso alcance en toda a rexión. Esperamos con interese apoiar o proxecto da nova terminal de cruceiros a medida que avanza, así como as oportunidades que xerará tanto para o porto como para o destino. O noso obxectivo é apoiar o crecemento a longo prazo de Ferrol como destino de cruceiros, á vez que nos aseguramos de que se beneficie da experiencia, os estándares e a conectividade da ampla rede rexional de GPH”.

A Autoridade Portuaria de Ferrol San Cibrao outorgou a GPH a concesión para construír e xestionar a terminal de cruceiros no porto de Ferrol por un período de 30 anos. O proxecto ocupará unha superficie total de 960 metros cadrados no peirao exterior e desenvolverase en dúas fases. Nunha primeira fase, construirase unha terminal de 480 metros cadrados cuxas obras se estima que comezarán este ano. A previsión é que se poidan empezar as operacións na tempada do 2027. Ferrol súmase así aos 35 portos operados por GPH en todo o mundo e máis de 22 millóns de pasaxeiros, reforzando así a súa presenza tanto en España como na rexión atlántica.