O consello de administración aprobou a firma dun convenio por importe de 200.000 euros para facilitar a implantación do hub enerxético dentro do obxectivo de converterse nun porto verde

A finalidade é lograr unha redución do consumo das instalacións, así como as emisións de CO2 e potenciar a descarbonización das fontes de enerxía

Ferrol, 20 de decembro de 2024

A Autoridade Portuaria de Ferrol-San Cibrao e o Instituto Tecnolóxico de Galicia (ITG) colaborarán no desenvolvemento do modelo enerxético do porto de Ferrol e a mellora enerxética das instalacións. O consello de administración celebrado esta mañá aprobou o proxecto de investimento e a firma do convenio entre ambos os organismos cun importe de 200.000 euros e un prazo de execución de dous anos prorrogables por dous máis. O convenio responde o obxectivo da APFC de ser “porto verde”, o que afecta o ciclo completo da actividade portuaria, desde o deseño e execución de infraestruturas, ata a explotación pasando pola optimización dos consumos de auga e enerxía. Todo cos principios de austeridade, autosuficiencia e reciclaxe.

Neste marco, e #de acordo con o convenio, o ITG realizará un estudo de solucións innovadoras en materia de xestión e xeración enerxética, incluíndo recomendacións para a constitución e operación dun ecosistema de enerxía verde coa premisa de beneficiar á maior parte posible dos actores do ámbito portuario. Este estudo incluirá a asistencia continua á Autoridade Portuaria sobre a evolución real dos escenarios de crecemento de xeración e demanda; unha avaliación de opcións tecnolóxicas do almacenamento e para posibles excedentes enerxéticos, considerando os balances diarios esperados no hub enerxético do porto para os diferentes escenarios de consumo e xeración previstos para o próximos cinco anos. Tamén inclúe o deseño técnico-administrativo da rede futura e unha análise de integración de operacións de consumidores de fóra do porto, unha oportunidade que ofrece a creación do novo hub enerxético do porto de Ferrol.

Ademais o ITG dará acceso á Plataforma IoT Flythings, permitindo a integración de sensores, scadas, dataloggers para a avaliación e análise en tempo real do rendemento enerxético e control do consumo de auga e enerxía, así como das futuras instalacións de xeración de enerxía; formará e asesorará ao persoal da APFSC en materia de eficiencia enerxética, sustentabilidade e uso de fontes renovables, e elaborará un Plan de mellora continua e asesoramento na implantación de medidas de mellora.

O obxectivo do convenio é o de conseguir unha redución do consumo enerxético das instalacións, así como a redución das súas emisións de CO2 e a descarbonización das súas fontes de enerxía, mediante unha maior xeración a partir de fontes renovables, aplicando o coñecemento e a colaboración do ITG. Isto permitirá dispoñer dun modelo extrapolable a outras propiedades e instalacións, onde se poidan aplicar os coñecementos adquiridos.

Outros asuntos

O consello de administración tamén aprobou a proposta para adxudicar á empresa S.A. de Obras e Servizos Copasa, o proxecto de renovación da vía que discorre encostada ás naves pola rúa principal da rede interior do porto de Ferrol. O importe é de 3.921.350 euros máis IVE e o prazo de execución é de 10 meses. Así mesmo, deu o visto e prace á modificación substancial da concesión titularidade de Megasa Siderúrxica prorrogando o prazo da mesma, baseándose nos investimentos executados nas súas instalacións por importe de 3 millóns de euros. A prórroga concrétase en 15 anos. Ademais, o órgano de dirección aprobou outorgar a Noatum Logistics Spain a prestación do servizo comercial de xestión dun depósito aduaneiro nas instalacións de Navantia-Fene.