A Autoridade Portuaria de Ferrol-San Cibrao acolle ata o próximo día 21 de xuño unha mostra de fotografías sobre o medio ambiente. A colección recolle as obras presentadas ao Certame organizado polo Ateneo Ferrolán, con motivo do "Día Mundial do Medio Ambiente" e conta co patrocinio do Porto de Ferrol.
O certame, composto por medio centenar de fotografías, conta cunha ampla participación de fotógrafos de Galicia e España que resaltan nas súas obras a importancia da natureza tanto desde o punto de vista do respecto como denunciando as agresións que recibe.
Por medio desta exposición o porto colabora co labor do Ateneo, invitando á reflexión e concienciación sobre o respecto ao medio, un dos principais enfoques da actividade da dársena ferrolá.
O gañador do certame, cuxo premio foi patrocinado polo Porto de Ferrol, foi Rubén Pérez Novo coa imaxe titulada "Menos consumo... mellor futuro".
