.:: Autoridade Portuaria de Ferrol - San Cibrao ::.

O Porto de Ferrol recibiu onte unha nova visita de estudantes ás súas instalacións. Ao redor de 35 nenos e nenas de 8 e 9 anos, estudantes de 1º e 2º de Primaria do Colexio Santa María das Pontes, gozaron durante unha xornada da dársena ferrolá achegándose ao seu funcionamento e historia.
No Porto Interior atenderon ás explicacións dos profesionais do CCS (Centro de Coordinación de Servizos) e mostráronselles as características básicas da actividade portuaria. Entre as paradas preferidas dos nenos está o Centro Interpretativo de Cabo Prioriño, onde se lles explicou, facendo un percorrido mediante paneis informativos, a gran obra que supón o Porto Exterior, como se traballa e que tipo de operacións levan a cabo nunha rada destas dimensións, sempre cun enfoque adaptado á idade dos estudantes.
A historia das baterías ocupou tamén parte desta visita didáctica. Os nenos do Colexio Santa María puideron revivir en primeira persoa a orixe e a evolución defensiva de Ferrol coa súa visita ás Baterías de Viñas e Cabo Prioriño Mozo, ambas as recuperadas e rehabilitadas pola Autoridade Portuaria.
Con iniciativas como esta o Porto de Ferrol estreita as relacións coa cidadanía e sobre todo cos máis novos, aproximándoos á realidade portuaria de comarca, ao respecto ao medio ambiente e participando activamente na súa formación.