Onte foi un día moi importante tanto para o Porto de Ferrol como para toda a cidade e comarcas. 5.000 turistas visitaron Ferrol a bordo dos transatlánticos “Independence of the seas” e “Discovery” e gozaron da hostalaría, o comercio e a cálida acollida de toda a cidadanía.
Craig Milan, vicepresidente de Royal Caribbean Cruise Lines, a naviera propietaria do “Independence of the Sexas”, visitou durante a xornada de onte a cidade quedando gratamente impresionado polo recibimento e a entrega mostrada por todos -cidadáns, comerciantes e hostaleiros- así como polo dispositivo coordinado pola Autoridade Portuaria para dar servizo ao turista e pola calidade de Ferrol e as súas comarcas como destino dos seus cruceiros.
O principal obxectivo marcado pola Autoridade Portuaria, que Ferrol e as súas comarcas saquen proveito da visita de cruceiros, pódese dar onte por conseguido.
Ademais, no referente ás excursións que organizan os buques, onte houbo varias que incluían visita a recursos turísticos de Ferrol e comarcas. Destacou especialmente a visita ao Arsenal Militar e ao Centro Interpretativo de Cabo Prioriño, desenvolvida por primeira vez, e que contou cunha moi boa valoración por parte dos turistas estranxeiros. Esta foi posible grazas á colaboración da Armada.
Os responsables da Autoridade Portuaria de Ferrol-San Cibrao mostráronse moi satisfeitos porque o traballo desenvolvido nos últimos meses, coa colaboración da Xunta de Galicia, está a dar os seus froitos.
