.:: Autoridade Portuaria de Ferrol - San Cibrao ::.

A MOSTRA, QUE ALBERGA TAMÉN UN PERCORRIDO POLA HISTORIA DA CRTVG, CHEGARÁ A CIDADE O PRÓXIMO VENRES 26 DE NOVEMBRO E SE PODERÁ GOZAR ATA O DÍA 1 DE DECEMBRO

CONVERTERSE EN TIRABOLEIROS, VISITAR AS CIDADES XACOBEAS, OU CRUZAR COMPOSTELA EN AERODESLIZADOR, SON PARTE DOS SEUS ATRACTIVOS

A Sala de Exposicións da Autoridade Portuaria de Ferrol-San Cibrao acolle dende o próximo venres 26 de novembro, a mostra itinerante e interactiva "Galiciadixital", de man da Secretaría Xeral de Medios.

A través desta exposición, enmarcada dentro das actividades organizadas con motivo do Centenario do Porto, preténdese achegar aos ferrolanos de todas as idades os contidos audiovisuais e multimedia realizados por empresas e universidades da comunidade, valéndose para iso dunha experiencia interactiva diferente á dos museos convencionais, xa que o visitante pode participar en todo o percorrido.

Os que se acheguen á Sala de Exposicións do Porto poderán gozar dalgúns dos contidos habituais da mostra, como o xogo "Aerodeslizadores por Compostela", no que poderán descender pola zona histórica dunha cidade galega virtual nun futurista deslizador desenvolvido pola Universidade de Santiago de Compostela (USC). Ademais, os ferrolanos poderán converterse durante uns días en tiraboleiros do Botafumeiro de la Catedral de Santiago, grazas un tiraboleiro virtual.

Un dos atractivos centrais da mostra é a posibilidade de somerxerse nun mundo virtual a través de proxeccións en tres dimensións como "As Cidades do Camiño" que ofrece a oportunidade de realizar paseos virtuais por aquelas cidades polas que discorre a Ruta Xacobea.

A exposición, que estará en Ferrol ata o día 1 en horario de 10 a 14 h e de 16 a 20 h de luns a domingo, acolle tamén unha serie de contidos encamiñados a celebrar os 25 anos de vida da CRTVG, e mesmo o visitante terá a oportunidade de converterse por uns minutos en improvisado presentador do "Telexornal".

Polo seu carácter educativo está previsto que varios colexios de Ferrol e a zona visiten e gocen esta mostra interactiva.