O Porto de Ferrol abriu novamente ao público as portas da Sala de Exposicións, nesta ocasión, para mostrar aos ferrolanos retallos da historia máis recente da dársena por medio da exposición "Un século de Autoridade Portuaria".
Con motivo do Centenario do Porto e a través de máis dunha vintena de paneis explicativos, elaborados con material gráfico do arquivo histórico do porto, a mostra está principalmente centrada nos últimos cen anos da institución: dende a creación da xunta de Obras no ano 1910, ata a actualidade.
As primeiras láminas están dedicadas a relatar, de xeito resumido, as orixes do porto e a súa importancia estratéxica a partir do século XVIII, para centrarse de cheo no último século, coa evolución dos seus peiraos e a enorme transformación da dársena e a cidade de Ferrol.
Ademais, faise especial entusiasmo na obra do Porto Exterior e reflíctense as principais accións da entidade co fin de abrirse á cidade: aspectos sociais, medio ambientais, náutica, deporte e o coidado do patrimonio, tanto natural coma cultural.
O documento máis importante da toponimia galega
Entre os principais alicientes desta exposición destaca a posibilidade de admirar unha reprodución dun exemplar da Carta Xeométrica de Galicia, de Domingo Fontán, o primeiro mapa realizado en España con métodos científicos e matemáticos.
Este exemplar da carta, composta por doce follas unidas e cun tamaño total de 215 cm por 232 cm, é propiedade da Autoridade Portuaria de Ferrol-San Cibrao e data do ano 1845. Foi restaurado e dixitalizado polo Porto e reproduciuse unha réplica para expoñelo con motivo desta exposición conmemorativa do Centenario da entidade.
Esta carta xeométrica de Galicia, en cuxa elaboración Domingo Fontán investiu ao redor de 17 anos, estivo vixente durante máis de 120 anos e ademais de ser o primeiro mapa realizado en España, seguindo métodos científicos, é tamén un dos primeiros de Europa, de aí o seu gran valor.
A reprodución deste valioso exemplar e a mostra completa da historia da Autoridade Portuaria, poderase visitar ata o próximo día 19 de setembro na Sala de Exposicións, de martes a domingo entre as 6 e as 9 da tarde. O obxectivo é achegar dun xeito divulgativo, sinxelo e visual a historia do porto ferrolano e os principais fitos conseguidos neste último século.
