.:: Ferrol - San Cibrao Port Authority ::.

O EVENTO, QUE SE CELEBRA NESTA OCASIÓN EN CANNES, É O ENCONTRO ANUAL MÁIS IMPORTANTE DO SECTOR EN EUROPA
O OBXECTIVO É REFORZAR A ESTRATEXIA DE RELANZAMENTO DA DÁRSENA FERROLANA PARA A CAPTACIÓN DE NOVAS ESCALAS

O Porto de Ferrol viaxa esta semana a Cannes (Francia) onde a partir de mañá comeza a Seatrade Europe, a feira do sector de cruceiros máis importante de Europa. A actuación enmárcase dentro da estratexia de relanzamento da dársena ferrolana para a captación de novas escalas de cruceiros en Ferrol.

En Cannes reunirase con algunhas das navieiras e operadores máis relevantes do sector e mostraranse as vantaxes e as calidades dun porto como o de Ferrol e os principais atractivos do ámbito que o rodea.

A Autoridade Portuaria está a realizar un importante esforzo en transmitir as calidades do Porto de Ferrol neste mercado, coa oferta da cidade e das súas bisbarras como destino novidoso e moi interesante para os pasaxeiros dos cruceiros. Durante este ano, Ferrol recibiu a visita de dous cruceiros, o Spirit of Adventure e o Saga Pearl II e para 2011 están previstas tres escalas.

A asistencia a este encontro realízase como sempre coa colaboración co IGAPE sobre a base do convenio subscrito no marco do Plan Ferrol.